శ్రీలు పొంగిన జీవగడ్డయి

రచన : రాయప్రోలు సుబ్బారావు గారు

శ్రీలు పొంగిన జీవగడ్డయి

పాలు పారిన భాగ్యసీమయి

వ్రాలినది యీ భరతఖండము

భక్తిపాడర తమ్ముడా !

వేదశాఖలు వెలసెనిచ్చట

ఆదికావ్యం బలరె నిచ్చట

బాదరాయణ పరమఋషులకు

పాదు సుమ్మిది చెల్లెలా !

విపిన బంధుర వృక్షవాటిక

ఉపనిషన్మదువొలికెనిచ్చట

విపుల తత్వము విస్తరించిన

విమల తలమిది తమ్ముడా !

పాండవేయుల పదనుకత్తుల

మండి మెరసిన మహితరణకథ

పండగల చిక్కని తెలుంగుల

కలిపి పాడవె చెల్లెలా !

దేశగర్వము దీప్తి చెందగ

దేశచరితము తేజరిల్లగ

దేశమరసిన ధీరపురుషుల

తెలిసి పాడర తమ్ముడా !

లోకమంతకు కాక బెట్టిన

కాకతీయుల కదనపాండితి

చీకిపోవని చేవపదముల

చేర్చి పాడవె చెల్లెలా !

తుంగభద్రా భంగములతో

పొంగి నింగిని బొడిచి త్రిళీ

భంగపడని తెలుంగునాథుల

పాటపాడర తమ్ముడా !

మేలి కిన్నెర మేళవించీ

రాలు గరగగ రాగమెత్తీ

పాలతీయని బాలభారత

పథము పాడవె చెల్లెలా !